३ मंसिर,रामेछाप । रामेछाप जिल्लामा हाल सम्म ७ हजार भन्दा बढीले राष्ट्रिय परिचय पत्र बनाएका छन् । जिल्लामा गत २०७७ साल साउन १ गतेदेखि राष्ट्रिय परिचय पत्र विवरण संकलनको काम सुरु भएको थियो ।

जिल्ला प्रशासन कार्यालय रामेछापले शुक्रबार रामेछाप टाइम्सलाई दिएको विवरण अनुसार ७७ साल साउन देखि असारसम्म ४ हजार ६ सय २४ र ०७८ साउन देखि कातिक महिनासम्म कूल ७ हजार एक सय ६९ जनाले राष्ट्रिय परिचय पत्र लिएको जानकारी दिएको छ । जसमा ४ हजार ५ सय ९० जना परुष र दुई हजार ५ सय ७९ जना महिला रहेका छन् ।

०७७ साल साउनमा कार्यक्रम संचालन भएदेखि सोही सालको भदौ महिना र ०७८ जेठमा भने निषेधाज्ञाको कारण काम रोकिएको सहायक प्रमुख जिल्ला अधिकारी एवं सूचना अधिकारी गीता गुरुङले रामेछाप टाइम्सलाई बताईन् । तत्कालिन अवस्थामा भने काम धमाधम भैरहेको गुरुङ्ले जानकारी दिइन् ।

राष्ट्रिय परिचयपत्र तथा पञ्जिकरण विभागमा पठाई, कार्ड तयार भएपछि जिल्ला प्रशासन कार्यालयबाट सम्बन्धित व्यक्तिलाई विवरण प्रदान गरिने गरेको छ । परिचयपत्र बनाउन नेपाली नागरिकताको प्रमाणपत्रको सक्कल र प्रतिलिपी, आमा र बुबाको नागरिकताको प्रतिलिपी उपलब्ध भएसम्म र नगारिकताको प्रमाणपत्रमा जन्म मिति नखुलेकाको हकमा सो खुल्ने प्रमाण वा स्थानीय तहको सिफारिस पत्र माग गरेको छ ।

सो पत्र पाउनको लागि कम्तिमा १६ वर्ष उमेर पुरा भएको हुनु पर्ने र नेपाली नागरिकताको प्रमाण पत्र लिएको हुनु पर्ने प्रशासनले जनाएको छ ।