३१ भदौ, रामेछाप । बाँध सफा गर्न लागेकाले बढी आउन सक्ने भन्दै माथिल्लो तामाकोशी जलविद्युत आयोजनाले प्रभावित क्षेत्रका बासिन्दालाई सचेत हुन आग्रह गरेको छ । 

आज शुक्रवार एक सूचना जारी गर्दै ४५६ मेगावाट क्षमताको  माथिल्लो तामाकोशी जलविद्युत आयोजनाले भोलि शनिवार बिहान ४ बजेदेखि राति १२ बजेसम्म नदी आसपास भएर गरिने काम गर्दा सचेतना अपनाउन आग्रह गरेको हो । 

आयोजनाको वार्षिक कार्यक्रम अनुसार शनिवार आयोजनाको जलाशय सफा गर्ने तयारी भएको हुँदा नदीमा पानीको मात्र बढ्न सक्ने दाबी गरिएको हो । 

जारी सूचनामा ‘तामाकोशी बाँधको तल्लो तटीय क्षेत्रमा पर्ने लामाबगर, छेतछेत¸ गोंगर, जगती, टुनिटार, जामुने, भोर्ले, सिंगटी, नयाँ पुल, किर्ने, खिम्तीसहित सुनकोशी ननिको दोभानसम्म नै तामाकोशी नदीको पानीको सतह बढ्ने÷घट्ने भइरहने हुनाले सो अवधिभर तामाकोशी नदीमा माछा मार्ने, नुहाउने, पौडी खेल्ने, लुगा धुने, वस्तुभाव लैजाने, गिटीबालुवा निकाल्ने, गाडी तार्ने जस्ता कार्यहरू नगर्न’ भनिएको छ । 

साथै नदी किनारमा परम्परा अनुसार मृतकहरूको दाहसंस्कार वा धार्मिक संस्कार गर्नु पर्दा अत्यन्त सतर्कता पूर्वक गर्न जारी सूचनामा भनिएको छ।