४ असोज, रामेछाप । मन्थली बचत तथा ऋण सहकारी संस्थाको बाल उपसमितिले सोमबार आफ्नो कार्यक्षेत्रका विद्यालयलाई सहभागी गराएर मावि स्तरीय वक्तित्वकला प्रतियोगीता गरेको छ । 

संस्थाका अध्यक्ष गोविन्द प्रसाद घिमिरेको अध्यक्षतामा सम्पन्न “सहकारी अभियानमा मन्थली सहकारीको योगदान” विषयक वक्तित्वकला प्रतियोगीतामा सेतिदेवी मा.वि सालुकी छात्रा राधिका श्रेष्ठ प्रथम, मन्थली माविकी छात्रा अस्मिता कार्की द्वितिय र मन्थली माविकै छात्र शुशिल कार्की तृतिय भएका छन् ।

उनीहरुले क्रमशः ५ हजार, ३ हजार, २ हजार पुरस्कार पाएको संस्थाको युवा उपसमितिका संयोजक नविन केसीले जानकारी दिए । 

त्यस्तै रुद्राक्षेश्वर माविकी दिलकुमारी आछामीले सान्त्वना हुदै नगद १ हजार जितेकी छन् । कक्षा ११ र १२ मा अध्ययनरत मन्थली नगरपालिका, रामेछाप नगरपालिका, खाँडादेवी गाउँपालिका र लिखुतामाकोशी गाउँपालिकाका विभिन्न ८ वटा विद्यालयका छात्र तथा छात्राहरुले भाग लिएका थिए ।

साथै प्रतियोगीतामा सहभागी विद्यालयहरुलाई सहभागीताको प्रमाणपत्र समेत उपलब्ध गराइएको केसीले बताए ।