२२ वैशाख, रामेछाप । रामेछापबाट काठमाडौँ जाँदै गरेको विद्युतीय माइक्रो दुर्घटनामा परेको छ । दुर्घटनामा छ जना घाइते भएका छन् । 

शनिवार मन्थलीबाट काठमाडौँ  जाँदै गरेको नम्बर खुल्न बाँकी इलेक्ट्रिक गाडी (इभी) दुर्घटना हुँदा ६ जना घाइते काभ्रे प्रहरीले जनाएको हो । आज दिउँसो २ बजे बिपी राजमार्ग अन्तर्गत काभ्रेको धुलिखेल नगरपालिका–११ स्थित पात्लेखेतमा ईभी दुर्घटनामा परेको प्रहरीले जानकारी दिएको हो । 

दुर्घटनामा मन्थली नगरपालिका वडा नं ८ चिसापानी बस्ने २८ वर्षीय श्रवढा कुमार माझी, उनकी श्रीमती ३५ वर्षीय शर्मिला माझी, छोरी ३ वर्षीय सोडिमा माझी, भाइ आशिष् माझी, सोही ठेगाना भएकी ६ वर्षीय मनीषा माझी र १६ वर्षीय सचिता गिरी घाइते भएको प्रहरीले बताएको छ । 

घाइते ६ जनाकै धुलिखेल अस्पतालमा उपचार भइरहेको प्रहरीले जानकारी गराएको छ। दुर्घटनामा परेको गाडीका चालक रामेछाप नगरपालिका–५  मीन बहादुर श्रेष्ठलाई प्रहरीले नियन्त्रणमा लिएको छ । 

प्रहरीका अनुसारमा ईभीको छतमा राखेर लगिएको एउटा खसी भने मरेको छ ।