१६ चैत, रामेछाप (मन्थली)। लुक्लामा मौसममा आएको खराबीको कारणले मन्थलीमा झण्डै दुई सय यात्रु रोकिएका छन् । आज उडान हुने सम्भावना नरहेको रामेछाप विमानस्थलको भनाई छ । 

रामेछाप विमान स्थल कार्यालय मन्थलीले रामेछाप टाइम्सलाई दिएको जानकारी अनुसार शुक्रवार बिहान ८ बजेदेखि नै उडान ठप्प भएको हो । 

‘सोलु खुम्बुको लुक्ला विमानस्थलमा भिजिबिलिटी कम हुँदा सिता, तारा र समिट एयरका विमान रामेछाप (मन्थली) ग्रउन्डमै राखिएको छ’, विमान स्थलका वरिष्ठ अधिकृत प्रज्ज्वल गुरागाईँले रामेछाप टाइम्ससंग भने । 

केही दिनयता मौसममा आएको खराबीको कारण नियमित सहज उडान हुन सकिरहेको छैन । भिजिबिलिटी कम भएपछि अहिले रामेछाप विमानस्थलबाट हेलिकप्टरले  चार्टर उडान गरिरहेको छ । 

‘यहाँबाट हेलिले सुर्के उडान गरिरहेको छ । दुई सय जना भन्दा बढी यात्रु यही रोकिएका छन् । आज उडान हुने सम्भावना कम छ । मन्थलीमा कुनै समस्या छैन । लुक्लाको मौसमले समस्या भएको हो’, उनले भने । 

दिउँसो १ ः १५ बजे रामेछापको आकाशमा हेलिकप्टरको चार्टर उडानहरू मात्रै भइरहेको छ । 

गत मार्च २५ तारिकदेखि रामेछाप विमान स्थल (मन्थली–लुक्ला) उडान सुरु भएको थियो । सगरमाथा लगायत प्रवेश गर्ने पर्यटकहरू मन्थली सम्म गाडीमा ल्याएर यहाँबाट उडान हुँदै आएको छ ।