अपडेट : रामेछापको पासेवनमा घरधनीलाई कुटपिट गरी सुन र पैसा लुट्ने सोही ठाउँका २ सहित ३ जना पक्राउ
१५ चैत, रामेछाप । रामेछापको दोरम्बा शैलुङ गाउँपालिका ४ स्थित पासेवन ओख्रेनीमा घरबेटीलाई कुटपिट गरी पैसा र दुई तोला सुन लुटपाट भएको घटनामा संलग्न रामेछापका दुई जनासहित तीन जना पक्राउ परेका छन् ।
पक्राउ पर्नेमा दोरम्बा शैलुङ गाउँपालिका वडा नं ४ बस्ने ३४ वर्षीय रोहित बहादुर थापामगर, सोही पालिकाको वडा नं २ बस्ने २२ वर्षीय तेजबहादुर थापामगर रहेको जिल्ला प्रहरी कार्यालय रामेछापले जानकारी दिएको छ ।
अर्का एक मकवानपुरको हेटौडा उप-महानगरपालिका वडा नं ५ बस्ने मेबहादुर राइको ४० वर्षीय छोरा खेम राई रहेका छन् । उनीहरूलाई जिल्ला प्रहरी कार्यालय रामेछापबाट खटिएको प्रहरी टोलीले दोलखाको मागापौवा भन्ने स्थानबाट नियन्त्रणमा लिएको थियो ।
उनीहरूले गत मंगलबार राति १२ : ३० बजेको समयमा पासेवन ओख्रेनीका ८८ वर्षीय हर्कबहादुर नगरकोटीको घरमा मूल ढोका फुटाई उनकी श्रीमती धनलक्ष्मी नगरकोटीलाई लछारपछार पारी कोठाभित्र राखिएको २ तोला सुनको गरगहना र नगद रु १५ हजार लुटेका थिए ।
