१० असोज, रामेछाप । रामेछापका प्रमुख जिल्ला अधिकारी (प्रजिअ) दीपक पहाडी महोत्तरी गएका छन् भने शोभाकर रेग्मी रामेछाप आउने भएका छन् । 

एक वर्ष भन्दा बढी जिल्लामा (सिडिओ) प्रमुख जिल्ला अधिकारी भएर काम गरेका पहाडीलाई सरकारले गरेको पछिल्लो सरुवाको क्रममा महोत्तरी पठाएपछि सोमबार कार्यालयमा भएको फेरी भेटौला अर्थात् बिदा भई महोत्तरी गएका हुन् ।

प्रशासनका कर्मचारीहरुसंग सामूहिक तस्विर खिचाउदै प्रजिअ दीपक पहाडी । 

उनी गत २०७८ साल असोज महिनामा जिल्ला आएका थिए । कोरोना महामारी लगायतले थिलथिलो पारेको बेलामा उनी जिल्ला आएका थिए । उल्लेखनीय नयाँ काम नगरे पनि प्रजिअ पहाडी विवादमा पर्ने काम पनि गरेनन् । 

त्यस्तै प्रजिअ पहाडीसगैँ केशव निरौला पनि बिदाई भएका छन् । प्रतिनिधि र प्रदेश सभा निर्वाचन नजिकिएका बेलामा जिल्लाको प्रजिअमा हाल गृह मन्त्रालयमा कार्यरत शोभाकर रेग्मी आउने भएका छन् । 

को-को बिदाई भए । 

आइतबार रामेछाप नगरपालिकाका प्रमुख प्रशासकिय अधिकृत रामचन्द्र लाम्गादे करिब दुई वर्ष सम्म नगरमा काम गरेर सरुवा भएका छन् । उनको आइतबार एक कार्यक्रमकाबीच नगर प्रमुख लब श्रीन्यौपाने र उप्रमुख बालाकुमारी कार्कीसहितले बिदाइ गरे ।

त्यस्तै जिल्ला सदरमुकाम समेत रहेको मन्थली नगरपालिकाका प्रमुख प्रशासकिय अधिकृत लिलाराज पौडेल पनि सरुवा भएका छन् । उनी मन्त्रालयमा तानिएका छन् । उनको भोली मंगलबार बिदाई हुने तयारी रहेको बताइएको छ । 

त्यस्तै केही दिन अगाडि सुनापति गाउँपालिकाका प्रमुख प्रशासकिय अधिकृत कमलराज श्रेष्ठ पनि बिदाई भएका थिए । उनी पनि मन्त्रालयमा तानिएका छन् ।